صباح الفل ياأستاذ عباس ياترى إيه آخر أخبار موضوع جدو مع الزمالك؟ عباس: باقولك إيه يابنى إحنا عندنا ماتش كمان كام يوم مع الإتحاد فى إسكندرية وإحنا مش قد جمهوره! ....: يعنى حضرتك عايزتقول إيه؟ عباس: بص قول على لسانى إن نادى الزمالك سيؤجل ملف جدو حتى بداية الموسم المقبل حرصآ على علاقته الطيبة بنادى الإتحاد ....مقاطعآ: مش هو ده نفسه نادى الإتحاد اللى أستغليتوا ثغرة عدم توثيقه للعقد وسرقتوا اللاعب منه! عباس: يابنى بلاش الكلام ده سرقة إيه دى شطارة وفهلوة! ....:‏ طيب كمل حضرتك كلامك عباس: هوإحنا كنا بنتكلم فى إيه يابنى فكرنى!! ....:‏ ياعم عباس بنتكلم عن موضوع جدو عباس: أه كنت باقولك إن إحنا حنأجل موضوعه لأول الموسم عشان اللاعب يعرف يركز ويرجع لمستواه عشان المنتخب! ....مقاطعآ: مش هو ده اللاعب اللى قولتوا إن إحنا حنربيه وحنبطله يلعب كورة!هو كان يحلم يعدى جنب سور نادى الزمالك! عباس: يابنى إحنا منقولش كده على جمال حمزة ده إبن من أبناء الزما.... .....منبهآ: ياأستاذعباس إحنا بنتكلم عن جدو مش جمال حمزة! عباس: معلش يابنى أصل موضوع جمال لسة طازة وأنا مش عارف ألاقيها منين ولامنين!كل يوم لعيب غير التانى ينضحك علينا فيه! ....:‏ حضرتك عايز تقول حاجة تانية عباس: شكرآ يابنتى!!! .........‏!‏ وفى يوم آخر ....:‏ أستاذ عباس حضرتك حتحضر بكرة الماتش فى إستاد المكس عباس: شوف يابنى ماتش الحرس من حقنا وح... ....مذكرآ: بكرة ماتش الإتحاد سعادتك! عباس: آه طبعآ طبعآ يابنى حآجى وحادخل الملعب مع أخويا وحبيبى محمدمصيلحى ده جمهور الإتحاد ده عظيم قوى وأنا محضرله مفاجأة وحنخلص الموضوع و... أصوات جانبية:خلاص ياأستاذ عباس ظبطنا كل حاجة مع الأمن والتلفزيون والحكام! عباس: الله ينور عليكم! أيوة يابنى إنت لسة معايا؟ ....:‏ أيوة حضرتك سامعكم!قصدى سامعك أتفضل كمل عباس: أيوة يابنى كنت بأقولك إن دى مباراة عادية فى كرة القدم وحنكسب ضرورى ونعرف كل واحد قيمته! .....:‏ طيب حضرتك حتيجى إسكندرية بكرة إمتى عشان تحضر الماتش؟ عباس: لأ يابنى أنا بكرة حيبقى عندى وعكة ومش حاقدر أحضر الماتش!! .....‏!‏ وبعد يومين من إنتهاء المباراة وفى برنامج رياضى ما. ....:‏أستاذ عباس حضرتك عايز تقول حاجة أخيرةفى موضوع جدو متهيألى حضرتك قلت إن الموضوع مؤجل و... عباس: مؤجل إيه؟جدو ده من حقنا وبتاعنا وإحنا سارقينه كويس قصدى إحنا موقفنا سليم والمحامى الإيطالى أكدلى ده ....:‏ طيب والمحامى ده معاكم من فترةطويلة فى قضايا أجوجو وأندرسون وشيكابالا وغيرهم ياترى كسبلكم كام قضية؟ عباس: ولاواحدة خسرهم كلهم بس محامى ممتازقوى بيريحنى كل مرة وهوبيقبض أتعابه مقدمآ ويقولى موقفنا قوى وسليم تمامآ! ....:‏ بس حضرتك قلت إنك حتأجل الموضوع عشان اللاعب يركز ويستعيد مستواه عباس: نأجل إيه جدو ده بتاعنا ومن حقنا ولو هنرى ميشيل مش عايزه أ.... .....:‏ قصدك حسام حسن! عباس: أيوة أيوة ما أنا عارف! لو هو مش عاوزه حأبيعه وأجيب جمال حمزة! ....:‏ ده راح الأهلى! عباس: حاجيب عبدالسلام نجاح وهانى سعيد! ....:‏ دول راحو المصرى! .عباس: حأجيب عمرو زكى وميدو! ....:‏ دول سابوك ورجعوا إنجلترا! عباس: حأجيب كالابا وأجوجو! ....:‏ دول هربوا منك ومش عايزين يرجعوا! عباس: بأقولك إيه ماتوجعش دماغى حأخلى حسام وإبراهيم يلعبوا!! بأقولك إيه أنا تعبت وعاوز أروح أنام! وأنت كمان روح نام عشان عندك قضية بكرة أنا حاسس إن قعدتنا دى حيبقى وشها حلو علينا إحنا الإتنين!! بأقولك إيه مش عايز المحامى الإيطالى؟!!! صورة طبق الأصل من يوميات عباس المحتاس!!